Summat Inungnut Turaangajunik Katiqsuivalliavat ammalu Summat Taimannailiuriaqsimaliqpat?

Inuit Tapiriikkut Kanatami (ITK) nalunaiqsisimalirmata ilinniarniliriniq - Inungnut ilitsivallialisaaqtunut Ilinniarutiksat piluaqtumik - sivulliqpautitausimaliriaqarningit ikajurutiulirniarlutik aaqqiksuisimalirniksamut qanuinngittiaqtuullutik ammalu quviasuttiaqtunik Inungni ilagiiktuni pivalliajjutiksauniaqtunut.

Kisianilu, tamarmik Inuit Nunaligijangit naliqqautitaullutik piliriaqalirviksanik pitaqaqtitaunngimmata ammalu atuinnauvviunatik piuniqsaujunut, piusituqarmut aturniqarajaqtunik ilitsivallialisaaqtunut ilinniarutiksanut piliriangujunut ammalu pijittirarutiuvaktunut. Ammalukkanniq, ilinnialisaaqtulirinirmut pijittirartiujuit Inuit Nunanganni kiinaujaqutissaqtaartitauvammata anginiqsaujumik ajjigiinngiuqtuullutik aviktuqtausimaniqaqtutik government-tuqakkut pilirianginnit, nalingilluunniit nalunaijaqtasimavagatik pijittirarutissautitauningita ilinniarnilirinirmi uvvaluunniit piusituqaminni pisimaliriaqaqtanginut Inuit nutaranginnit.

ITK-kut, ilagillunigit Inungnut surusirnut pairivvilirijikkunnut aaqqiksuijigijaujut Inuit Nunalilimaanginni, piliriaqaliqsimavut pilirianguliqullugu atausiuluaqtuni kiinaujaqutissaqtaarviuvaktunut ammalu aaqqiumajjusiuvaktunut atuinnautittivannginniujuq Inuit surusingit pivallianiqaqtitausimaliqullugit anginiqsaujumik. Pitaqanngitillugit aaqqiksuqtausimallutik Inungnut turaangatitaullutik ilitsivallialisaaqtunut ilinniarutiksanik, aaqqiksuivallialiqtugut qaritaujanuaqtausimallutik katiqsuarijausimalirniaqtunik piusituqarmut ammalu uqausilirinirmut aturniqarajaqtunik titiraqtausimajunik atuinnautitaulirniaqtunik tamainut surusirnik pairivviujunut Inuit Nunanganni. Taakkua katiqsuangusimaliqtut aturniqaqtuuqugivaqput asinginuttauq ilaqaqtillugit ilinniaqtittijinik, angajuqqaarijaujunik, maligaliuqtiuvaktunik, ammalu sunatuinnanik qaujisaqtiuvaktunik. 

Ikajuqtigiiktuta piliriaqaqatiqaqpugut Kanatami Inuit Ilinniarnilirinirmut Katimajiralaanginik atuliqtitauqullugit isumaliurutigisimajangit Kanatami Inuit Iilinniarnilirinirmut Parnautingit ammalu quvvaqtitaugiaqsimaliqullugit ilinniarniliriniit tunngavviqaqtitausimajut Inuit qaujimajanginut, silarjualimaami qaujimaniujunut ammalu piusituqarijaujunut.