English - Click here | Inuktitut - Taanna naqillugu
ᑲᑎᖅᓱᒐᑦ: ᐃᓄᐃᑦ ᐃᓕᓐᓂᐊᓕᓵᖅᑐᓄᑦ ᐃᓕᓐᓂᐊᖅᑎᑦᓯᔾᔪᑎᒃᓴᓄᑦ ᑐᓂᓯᓯᒪᓕᕐᓂᐊᕐᓂᕐᒧᑦ ᐊᖏᕈᑎᒋᔭᐅᓯᒪᔪᑦ
ᑭᖑᓪᓕᖅᐹᒥᑦ ᐋᖅᑭᒋᐊᖅᑕᐅᓂᖓ: 01/09/2015
ᖁᔭᓐᓇᒦᒃ ᐱᖁᑎᒋᔭᕐᓂᒃ ᑲᑎᖅᓱᒐᑦ: ᐃᓄᐃᑦ ᐃᓕᓐᓂᐊᓕᓵᖅᑐᓄᑦ ᐃᓕᓐᓂᐊᖅᑎᑦᓯᔾᔪᑎᒃᓴᓄᑦ ("ᑲᑎᖅᓱᒐᑦ") ᑐᓂᓯᖃᑕᐅᔪᒪᓂᖃᕋᕕᑦ, ᖃᕆᑕᐅᔭᑎᒍᑦ ᑲᑎᖅᓱᐊᖑᓯᒪᔪᓄᑦ ᑲᒪᒋᔭᐅᓪᓗᑎᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ (ITK), ᑲᓇᑕᓕᒫᒥ ᐃᓄᐃᑦ ᑲᑐᔾᔨᖃᑎᒌᒋᔭᖏᑦ ᑲᓇᑕᒥ.
ᒪᑯᐊ ᐊᕕᒃᑐᖅᓯᒪᓂᖏᓂ ᐅᖃᐅᓯᕆᔭᐅᓯᒪᓂᐊᖅᑐᑦ ᐃᓗᓕᖃᕐᒪᑕ ᐱᒻᒪᕆᐅᑎᐅᓪᓗᑎᒃ ᑐᓴᒐᒃᓴᖁᑎᓂᒃ ᐱᔾᔪᑎᖃᖅᑐᑎᒃ ᐱᔪᓐᓇᐅᑎᒋᔭᕐᓂᒃ ᐊᒻᒪᓗ ᐱᓕᕆᐊᒃᓴᕆᓕᕐᓂᐊᖅᑕᕐᓂᒃ ᑐᕌᖓᑎᓪᓗᒋᑦ ᑐᓂᓯᓯᒪᓂᕐᓄᑦ ᑎᑎᕋᖅᑕᐅᓯᒪᔪᖁᑎᓐᓂᒃ ᑲᑎᖅᓱᒐᓄᑦ. ᑕᒪᒃᑯᐊ ᑐᖖᒐᕝᕕᖁᑎᒋᔭᐅᔪᑦ ᐋᖅᑭᒃᓱᐊᖑᓯᒪᓕᓚᐅᕐᒪᑕ ᓈᒻᒪᒃᑐᑎᒍᑦ ᓇᓕᖅᑲᕇᓕᖅᑎᑕᐅᓯᒪᖁᓪᓗᒋᑦ ᐱᔪᓐᓇᐅᑎᖃᕐᓂᑎᑦ ᑐᓂᓯᓯᒪᔫᓂᕐᓂ ᑲᑎᖅᓱᒐᓄᑦ ᐊᒻᒪᓗ ᐊᑐᐃᓐᓇᐅᑎᑕᐅᓂᖏᓂ ᑲᑎᖅᓱᐊᖑᔪᓂᑦ ᐃᓕᓐᓂᐊᖅᑎᑦᑎᔾᔪᑎᒋᓂᐊᕐᓗᒋᑦ. ᑎᑎᕋᖅᓯᒪᔪᖁᑎᓐᓂᒃ ᑐᓂᓯᓯᒪᓂᕐᓄᑦ ᑲᑎᖅᓱᒐᓄᑦ, ᐊᖏᕈᑎᒋᓯᒪᒐᕕᒋᑦ ᑐᖖᒐᕝᕕᖁᑎᓕᐊᖑᓯᒪᔪᑦ ᐅᖃᖅᑕᐅᓯᒪᓂᖏᑦ ᑖᒃᑯᐊ ᐊᑖᓂ. ᑖᒃᑯᐊ ᐊᖏᕈᑎᖃᖅᓯᒪᓂᕐᒧᑦ ᑎᑎᕋᖅᑕᐅᓯᒪᔪᑦ ᐅᖃᓕᒫᖅᓯᒪᑦᑎᐊᓕᓚᐅᕐᓗᒋᑦ ᐅᕙᑦᑎᓐᓄᑦ ᖃᓄᑐᐃᓐᓇᖅ ᐊᐱᖅᑯᑎᒃᓴᕆᔭᕐᓂᒃ ᑐᑭᓯᒋᐊᕐᕕᖃᕈᓐᓇᑦᑎᐊᖅᑎᑕᐅᕗᑎᑦ.
1. ᐱᔪᓐᓇᐅᑎᒋᔭᑎᑦ
ᐱᖁᑎᖃᕐᓂᖅ: ᐸᐃᑉᐹᑎᒍᑦ ᐱᔪᓐᓇᐅᑎᖃᖅᐳᑎᑦ ᐱᖃᕐᓂᕋᐅᑎᓂᒃ ᓴᓇᓯᒪᔭᕐᓄᑦ ᑎᑎᕋᖅᓯᒪᔭᕐᓄᓪᓘᓐᓃᑦ, ᑖᒃᑯᐊ ᑐᓐᓂᕆᔭᑎᑦ ᑲᑎᖅᓱᐊᖑᔪᓄᑦ. ᐱᔪᓐᓇᐅᑎᖃᖅᐳᑎᑦ ᓇᖕᒥᓂᖃᕐᓂᕐᓄᑦ ᐊᓯᐊᒍᑦ ᑎᑎᕋᖅᓯᒪᔪᒃᑯᑦ ᓴᖅᑭᑎᑦᑎᔪᓐᓇᕐᓂᒻᒥᒃ.
ᐊᐅᓚᑦᓯᔨᐅᓃᑦ: ᑲᑎᖅᓱᐊᖑᕙᓪᓕᐊᔪᓂᑦ ᑐᓂᓯᒪᓕᓚᐅᖅᑕᕐᓂᒃ ᐲᖅᓯᓯᒪᓕᖁᔨᓗᑎᑦ ᐊᐱᕆᔪᓐᓇᖅᑎᑕᐅᕗᑎᑦ, ᖃᖓᑐᐃᓐᓇᖅ. ᖃᓄᐃᓕᖓᑎᓪᓗᒍ ᐊᑐᐃᓐᓇᐅᑎᓯᒪᓂᑎᑦ ᐊᒻᒪᓗ ᐊᓯᓐᓂᑦ ᐊᑐᖅᑕᐅᔪᓐᓇᕐᓂᖏᓐᓄᑦ ᐱᔾᔪᑎᖃᖅᑐᓂᒃ ᐊᓯᔾᔩᓯᒪᓕᕈᓐᓇᖅᐳᑎᑦ. ᑭᓯᐊᓂᓗ, ᐅᔾᔨᕆᔭᐅᔭᕆᐊᖃᖅᐳᖅ, ᑎᑎᕋᖅᓯᒪᔪᖁᑎᓂᒃ ᐲᖅᓯᓯᒪᓕᕐᓂᖅ ᑲᑎᖅᓱᐊᖑᔪᓂᑦ ᑭᓪᓕᖃᓕᕈᑎᐅᓂᐊᖖᒋᒻᒪᑕ ᐊᑐᖅᐸᒃᑐᑦ ᐊᑐᓕᐊᓂᓚᐅᖅᑐᑦ ᐅᕝᕙᓘᓐᓃᑦ ᐊᑐᒃᑲᓐᓂᕈᓐᓇᕐᓂᖏᑦ ᒪᓕᒐᖁᑎᓂᒃ ᒪᓕᑦᑎᐊᕐᓂᖃᕐᓗᑎᒃ ᑎᑎᕋᖅᓯᒪᔫᑎᓂᒃ ᑭᓪᓕᖃᓕᖅᑎᑕᐅᓯᒪᓂᐊᖖᒋᒻᒪᑕ. ᐃᓕᒃᑎᑕᐅᔪᒪᒍᕕᑦ ᖃᓄᖅ ᐊᓯᔾᔩᓯᒪᔪᒪᓗᑎᑦ ᑐᒃᓯᕋᕈᑎᖃᕈᑎᒥᒃ, ᐅᕝᕙᓘᓐᓃᑦ ᐱᖁᑎᒋᔭᐃᑦ ᐲᖅᑕᐅᓯᒪᓕᖁᓗᒍ ᑲᑎᖅᓱᐊᖑᔪᓂᑦ, ᖃᐅᔨᒋᐊᕈᓐᓇᖅᐳᑎᑦ ᐅᕙᑦᑎᓐᓂᑦ ᐃᕐᖐᓐᓇᐅᑎᒃᑯᑦ ᓇᕿᓪᓗᒍ ᖃᐅᔨᒋᐊᕐᕕᒋᑎᒍᑦ ᒪᒃᐱᒐᖓᓂ.
ᐅᔾᔨᕆᓗᒍ: ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑐᓂᓯᓯᒪᓂᕐᓂᒃ ᑲᑎᖅᓱᐊᖑᔪᓄᑦ ᐃᓕᑕᕆᔭᐅᓯᒪᓕᕐᓂᐊᕋᕕᑦ ᓇᓗᓇᐃᖅᓯᓯᒪᓕᖖᒋᑐᐊᕈᕕᑦ ᑭᓇᐅᓃᑦ ᓴᖅᑭᑎᑕᐅᓯᒪᖁᓇᒍ ᑐᓂᓯᓯᒪᓕᕈᕕᑦ ᑎᑎᕋᖅᓯᒪᔪᓂᒃ ᐅᕝᕙᓘᓐᓃᑦ ᑭᖑᓂᐊᒍᑦ ᑐᓴᖅᑎᑦᑎᓯᒪᓕᖖᒋᒃᑯᕕᑦ ᑭᓇᐅᓃᑦ ᓴᖅᑭᑕᐅᓯᒪᓕᖁᖖᒋᓐᓂᕐᓂᑦ. ᓇᓕᑐᐃᓐᓇᖏᓐᓄᑦ ᑐᓂᓯᒪᓕᖅᑕᕐᓄᑦ, ᐃᓕᑕᕆᔭᐅᓯᒪᓕᕐᓂᐊᖅᐳᑎᑦ ᑎᑎᕋᖅᑎᐅᓚᐅᕐᓂᕐᓄᑦ, ᓇᖕᒥᓂᖃᐅᑎᓂᒃ ᑎᒍᒥᐊᖅᑎᐅᓂᕐᓄᑦ ᑎᑎᕋᖅᑎᐅᓚᐅᕋᕕᑦ, ᐅᕝᕙᓘᓐᓃᑦ ᑕᒪᒃᑮᓐᓄᑦ (ᐊᑐᓃᖓᔪᒥᒃ ᐊᑐᕋᔭᖅᑐᖅ).
2. ᑎᑎᕋᖅᓯᒪᔪᖁᑎᓂᒃ ᑐᓂᓯᓯᒪᓕᕐᓂᖅ
ᐊᖅᐸᓯᓛᖅ ᐅᑭᐅᕆᔭᐅᖁᔭᐅᓯᒪᔪᖅ
ᑭᒃᑯᑐᐃᓐᓇᐃᑦ 18-ᓂᒃ ᐅᖓᑖᓄᓪᓘᓐᓃᑦ ᐅᑭᐅᖃᕈᑎᒃ ᑐᓂᓯᓯᒪᓕᕈᓐᓇᕐᓂᐊᖅᑐᑦ ᑎᑎᕋᖅᓯᒪᔪᖁᑎᓂᒃ ᑲᑎᖅᓱᒐᓄᑦ.
ᓇᓗᓇᐃᖅᓯᓂᖅ ᑐᓂᓯᓯᒪᔪᓐᓇᕐᓂᕐᓄᑦ ᐱᔪᓐᓇᐅᑎᖃᖅᑎᑕᐅᓂᕐᓂᒃ
ᑲᑎᖅᓱᒐᕐᓄᑦ ᑎᑎᕋᖅᓯᒪᔪᖁᑎᓐᓂᒃ ᑐᓂᓯᓯᒪᓂᒃᑯᑦ ᓇᓗᓇᐃᖅᓯᓯᒪᓕᕋᕕᑦ ᑎᒍᒥᐊᖅᑎᐅᓂᕐᓂᒃ ᐃᔾᔪᐊᖅᑕᐅᔭᕆᐊᖃᖖᒋᓐᓂᖏᑕ ᑎᑎᕋᖅᓯᒪᔪᓕᐊᖑᓯᒪᔪᑦ ᐅᕝᕙᓘᓐᓃᑦ ᒪᓕᒐᑎᒍᑦ ᐱᔪᓐᓇᐅᑎᖃᖅᑎᑕᐅᓂᕐᓂᒃ ᑐᓂᓯᓯᒪᓕᕈᓐᓇᕐᓂᕐᒧᑦ ᑎᑎᕋᖅᓯᒪᔪᖁᑎᓂᒃ ᑲᑎᖅᓱᐊᖑᔪᓄᑦ ᐊᒻᒪᓗ ᑐᓂᓯᓯᒪᓕᖅᑐᑎᑦ ᓚᐃᓴᖁᑎᐅᔪᓂᒃ ᐃᓄᐃᑦ ᑕᐱᕇᑦ ᑲᓇᑕᒥ ᑎᑎᕋᖅᓯᒪᔪᖁᑎᓂᒃ ᐊᑐᕈᓐᓇᕐᓂᖏᓐᓂᒃ ᓲᕐᓗ ᓇᓗᓇᐃᔭᖅᑕᐅᓯᒪᒻᒪᑕ ᐊᕕᒃᑐᖅᓯᒪᓂᖏᓐᓂ ᑖᒃᑯᐊ ᐊᑖᓂ ᑎᑎᕋᖅᑕᐅᓯᒪᔪᑦ ᑲᓇᑕᒥ ᐃᔪᐊᖅᑕᐅᔪᓐᓇᖖᒋᓐᓂᖏᓐᓄᑦ ᐱᖁᔭᔾᔪᐊᖅ ᓯᖁᒥᑦᓯᓯᒪᓕᕐᓂᐊᕋᑎᒃ. ᑎᑎᕋᖅᑕᐅᓯᒪᔪᑦ ᐊᑕᐅᓯᐅᖖᒋᑦᑐᒥᑦ ᑎᑎᕋᖅᑎᖃᓚᐅᕐᓂᖅᐸᑕ, ᑕᐃᓐᓇ ᑐᓂᓯᓯᒪᔪᕕᓂᖅ ᑎᑎᕋᖅᓯᒪᔪᓂᒃ ᓇᓗᓇᐃᖅᓯᓯᒪᔪᓂᒃ ᐊᑐᓂ ᑎᑎᕋᖅᑎᐅᓚᐅᖅᑐᓂᑦ ᐊᖏᖅᑕᐅᓂᖃᕐᓂᕐᒥᓂᒃ ᑎᑎᕋᖁᑎᕕᓂᕐᒥᓐᓄᑦ ᑲᑎᖅᓱᒐᓄᑦ ᑐᓂᔭᐅᓯᒪᓕᕈᓐᓇᖁᔭᐅᓗᑎᒃ.
ᐃᓱᒪᒃᑯᑦ ᓇᒻᒥᓂᖁᑎᖃᕐᓂᕐᒧᑦ ᐱᔪᓐᓇᐅᑎᒋᔭᐅᔪᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ
ᐱᖁᑎᓄᑦ ᐃᓗᓕᖃᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᕝᕙᓘᓐᓃᑦ ᐊᓯᖏᓐᓂᒃ ᐃᓕᖅᑯᓯᑐᖃᕐᒥ ᐊᒃᑐᖅᑕᐅᓴᕋᐃᓐᓇᖅᑐᓂᒃ ᑎᑎᕋᖅᑕᐅᓯᒪᔪᓄᑦ, ᐊᒻᒪᓗ ᑕᐃᓐᓇ ᑎᑎᕋᖅᑎᐅᓚᐅᖅᑐᖅ ᐅᕝᕙᓘᓐᓃᑦ ᑎᑎᕋᖅᑎᐅᓚᐅᖅᑐᑦ ᐃᓱᒪᒋᔭᐅᑎᓐᓇᒋᑦ ᑎᒍᒥᐊᖅᑎᐅᓂᕐᒧᑦ ᐱᔪᓐᓇᐅᑎᖃᕐᓂᖏᓐᓂᒃ ᐅᕝᕙᓘᓐᓃᑦ ᖃᐅᔨᒪᔭᐅᔪᑐᖃᕐᓂᒃ ᐸᐸᑦᑎᔨᐅᓂᕐᒧᑦ, ᓇᓗᓇᐃᖅᓯᓯᒪᓕᕆᐊᖃᖅᐳᑦ ᑎᒍᒥᐊᖅᑎᐅᔪᒥᒃ(ᓂᒃ) ᐊᒻᒪᓗ/ᐅᕝᕙᓘᓐᓃᑦ ᓇᓗᓇᐃᖅᓯᓯᒪᓕᕆᐊᖃᖅᑐᑎᒃ ᑐᓂᓯᓯᒪᓕᓚᐅᕐᓂᕐᒥᓐᓂ ᐅᓪᓗᖓᓂᒃ ᐅᖃᖅᓯᒪᔪᓂᒃ ᓈᒻᒪᒋᔭᐅᓯᒪᓚᐅᕐᓂᕐᒥᓐᓂᒃ ᑐᓂᓯᓯᒪᔪᓐᓇᕐᓂᕐᒥᓐᓄᑦ ᑎᑎᕋᖅᑕᐅᓯᒪᔪᖁᑎᓂᒃ ᑲᑎᖅᓱᐊᖑᔪᓄᑦ. ᑎᒍᒥᐊᖅᑎᐅᔪᑦ ᐅᕝᕙᓘᓐᓃᑦ ᓇᒻᒥᓂᖃᖅᑎᐅᔪᑦ ᐃᓄᐃᑦ ᐊᒻᒪᓗ ᓄᓇᖅᑲᑎᒌᒃᑐᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᒪᔭᐅᖖᒋᓐᓂᖅᐸᑕ, ᑎᑎᕋᖅᑎᐅᔪᑦ ᖃᐅᔨᒋᐊᕐᕕᖃᕆᐊᖃᖅᐳᑦ ᐱᐅᓯᑐᖃᓕᕆᔨᑦ ᐃᖅᑲᓇᐃᔭᕐᕕᖓᓐᓂᑦ, ᐱᐅᓯᑐᖃᓕᕆᕝᕕᒃᑯᓐᓂᑦ, ᑎᑎᖅᑲᖁᑎᑐᖃᕐᓄᑦ ᑐᖅᑯᐊᖃᕐᕕᒻᒥᑦ, ᐅᕝᕙᓘᓐᓃᑦ ᐊᓯᖏᓐᓂᑦ ᓄᓇᓕᐅᔪᒥ ᑲᑐᔾᔨᖃᑎᒌᖁᒋᔭᐅᔪᓂᑦ ᖃᐅᔨᒋᐊᕐᓂᐊᕐᓗᒋᑦ ᖃᓄᖅ ᓈᒻᒪᓐᓂᖅᐸᐅᔪᒃᑯᑦ ᐱᓕᕆᐊᕆᔭᐅᔭᕆᐊᖃᕐᒪᖔᑕ ᐊᖏᖅᑕᐅᓯᒪᔾᔪᑎᓂᒃ ᐱᓯᒪᓕᕈᑎᒃᓴᒥᓐᓂᒃ ᑐᓂᓯᓯᒪᓕᕐᓂᐊᕐᓗᑎᒃ ᑎᑎᕋᖅᑕᐅᓯᒪᔪᓂᒃ ᑲᑎᖅᓱᐊᖑᔪᓄᑦ.
ᐃᓄᐃᑦ ᑕᐱᕇᑦ ᑲᓇᑕᒥ ᐃᓕᓴᖅᓯᐅᒪᓂᐊᖖᒋᒻᒪᑕ ᑎᑎᕋᖅᑎᐅᓚᐅᖅᑐᓂᒃ ᐱᓯᒪᔪᓂᒃ ᓈᒻᒪᒋᔭᐅᓯᒪᔾᔪᑎᓂᒃ ᐊᑐᖃᑦᑕᕈᓐᓇᖅᑎᑕᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᔾᔪᐊᖅᑕᐅᔪᓐᓇᖖᒋᓐᓂᖏᓐᓂᒃ ᓇᒻᒥᓂᖃᖅᑎᐅᓂᕐᓄᑦ ᑎᒍᒥᐊᖅᑎᐅᓂᕐᓂᒃ. ᐃᓱᒪᒃᑯᑦ ᓇᒻᒥᓂᖁᑎᖃᕐᓂᕐᒧᑦ ᐱᔪᓐᓇᐅᑎᒋᔭᐅᔪᑦ ᓴᖅᑭᑕᐅᓯᒪᓂᖏᓐᓂ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᓱᓕ ᑎᒍᒥᐊᖅᑕᐅᓂᖃᕐᒪᑕ ᓄᓇᓕᒋᔭᐅᔪᒥᑦ ᐅᕝᕙᓘᓐᓃᑦ ᓄᓇᓕᒋᔭᐅᔪᓂᑦ ᐃᓕᔭᐅᓯᒪᖃᑕᐅᒐᓗᐊᖅᑎᓪᓗᒋᑦ ᑲᑎᖅᓱᐊᖑᔪᓄᑦ.
ᒪᑐᐃᖓᑦᑎᐊᖅᐳᒍᑦ ᐊᓯᖏᓐᓂᒃ ᐃᓱᒪᓕᐅᕆᔭᐅᓯᒪᔪᓄᑦ ᐊᒻᒪᓗ ᒥᐊᓂᕆᔭᐅᑦᑎᐊᕈᓐᓇᕐᓂᖏᓐᓄᑦ ᓄᓇᓕᐅᔪᒥ ᖃᐅᔨᒪᔭᑐᖃᕆᔭᐅᔪᑦ ᑐᓴᖅᑎᑕᐅᔪᒪᑦᑎᐊᕐᒥᔪᒍᑦ ᐊᒻᒪᓗ ᐃᑲᔪᖅᑕᐅᒃᑲᓐᓂᕈᓐᓇᕐᒪᖔᑕ ᓄᓇᓕᐅᔪᐃᑦ ᑐᓂᓯᓯᒪᖃᑦᑕᓕᖁᓪᓗᒋᑦ ᑲᑎᖅᓱᒐᓄᑦ.
3. ᑐᓂᔭᐅᓯᒪᔪᓄᑦ ᐊᑐᐃᓐᓇᐅᑎᑦᑎᓂᖅ
ᑐᓂᓯᓯᒪᓕᕐᓂᖅ ᓚᐃᓴᖁᑎᓂᒃ ᐃᓄᐃᑦ ᑕᐱᕇᑦ ᑲᓇᑕᒥ
ᑐᓂᓯᓯᒪᓕᕐᓂᒃᑯᑦ ᑎᑎᕋᖅᓯᒪᔪᖁᑎᓐᓂᒃ ᑲᑎᖅᓱᐊᖑᔪᓄᑦ ᑐᓂᓯᓯᒪᒐᕕᑦ ᐱᔪᓐᓇᐅᑎᒥᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᓂᖏᖅᑕᕈᑎᒋᓂᐊᖖᒋᓪᓗᒋᑦ, ᓯᓚᕐᔪᐊᓕᒫᒧᑦ, ᐃᓚᐃᓐᓇᖅᓲᑎᐅᙱᑦᑐᒥᒃ ᓚᐃᓴᖃᖅᑎᑦᑎᓂᕐᒧᑦ (ᑭᓯᐊᓂ ᐊᑐᕆᐊᖃᖅᑐᑎᑑᓐᓇᒋᑦ) ᑎᑎᕋᖅᓯᒃᑲᓐᓂᕈᓐᓇᐅᑎᓂᒃ, ᑐᖅᑯᐊᖃᕈᓐᓇᕐᓂᕐᒥᒃ, ᐊᑐᕈᓐᓇᕐᓂᕐᒥᒃ, ᐊᒻᒪᓗ ᑕᑯᔅᓴᐅᑎᑦᑎᔪᓐᓇᕐᓂᖏᓐᓂᒃ ᑭᒃᑯᑐᐃᓐᓇᕐᓄᑦ ᐃᓄᓐᓄᑦ ᑎᑎᕋᖅᑕᐅᓯᒪᔪᖁᑎᓂᒃ, ᖃᓄᑐᐃᓐᓇ ᖃᕆᑕᐅᔭᑎᒍᑦ ᐋᖅᑭᒃᓱᖅᑕᐅᓯᒪᓗᑎᒃ, ᐃᓗᐃᒃᑲᐅᑎᓪᓗᒋᑦ ᐅᕝᕙᓘᓐᓃᑦ ᐃᓚᑐᐃᓐᓇᖏᓐᓂᒃ, ᐊᒻᒪᓗ ᑎᒥᖁᑎᒋᔭᐅᔪᑎᒎᖅᑎᑕᐅᓯᒪᓗᑎᒃ (ᓲᕐᓗ, ᑭᒃᑯᑐᐃᓐᓇᕐᓄᑦ ᑐᓴᒐᔅᓴᖁᑎᑖᕐᕕᐅᕙᒃᑐᓕᕆᔨᓂᑦ) ᐃᓚᐅᑎᓪᓗᒋᑦ ᖁᕝᕙᑦᑎᑦᑎᒋᐊᖅᐸᓐᓂᕐᓂ ᑲᑎᖅᓱᐊᖑᔪᖁᑎᓂᒃ ᑐᖖᒐᕕᖃᖅᑎᑕᐅᓪᓗᑎᒃ ᐊᖏᖅᓯᒪᔾᔪᑎᖃᕈᑎᒃᑯᑦ ᐊᒻᒪᓗ ᑭᓪᓕᖃᓕᖅᑎᑦᑎᓯᒪᓂᕐᒧᑦ ᐊᑐᐃᓐᓇᐅᑎᑦᑎᓂᕐᒧᑦ ᐊᒻᒪᓗ ᐊᑐᖅᑕᐅᔪᓐᓇᕐᓂᖏᑕ ᐋᖅᑭᔅᓱᐊᖑᓯᒪᓕᓚᐅᖅᑐᖅ ᑐᓂᓯᑐᐊᕈᕕᑦ. ᑕᑯᓗᒋᑦ ᐊᑐᐃᓐᓇᐅᑎᑦᑎᓂᕐᒧᑦ ᐊᒻᒪᓗ ᐊᑐᖃᑦᑕᕐᓂᕐᒧᑦ ᑎᑎᕋᖅᓯᒪᔪᑦ ᐊᒡᒍᖅᓯᒪᓂᖏᑎᒍᑦ ᐊᑖᒍᑦ ᓇᓗᓇᐃᔭᐅᑎᓕᐊᖑᓯᒪᔪᓂ ᖃᓄᐃᑦᑑᓂᖏᑕ ᐊᖏᖅᓯᒪᓪᓗᑎᒃ ᐊᑐᐃᓐᓇᐅᑎᑦᑎᓃᑦ ᐊᒻᒪᓗ ᑭᓪᓕᖃᓕᖅᑎᑕᐅᓯᒪᓂᖏᑦ ᐊᑐᐃᓐᓇᐅᑎᑕᐅᓂᖏᓐᓂ ᑐᓂᓯᓯᒪᔪᒥᑦ ᐊᑐᓕᖅᑎᑕᐅᔪᓐᓇᖅᑐᑦ ᑎᑎᕋᖅᓯᒪᔪᖁᑎᒋᔭᒥᓐᓄᑦ.
ᐊᑐᐃᓐᓇᐅᑎᑦᑎᓂᖅ
ᑕᒪᕐᒥᒃ ᐱᖁᑎᑦ ᑲᑎᖅᓱᐊᓃᑦᑐᑦ "ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᑎᑕᐅᕗᑦ" ᑕᐃᓐᓇ ᑐᓂᓯᓯᒪᓚᐅᖅᑐᖅ ᐊᓯᐊᒍᑦ ᑐᔅᓯᕋᐅᑎᖃᖖᒋᑉᐸᑦ. ᑕᒪᓐᓇ ᑐᑭᖃᖅᐳᖅ ᑕᐃᒃᑯᐊ ᐱᖁᑏᑦ ᕿᓂᕐᕕᐅᔪᓐᓇᕐᒪᑕ, ᕿᒥᕐᕈᔭᐅᔪᓐᓇᕐᒪᑕᓗ ᐊᒻᒪᓗ ᐊᒧᔭᐅᓯᒪᓕᕈᓐᓇᖅᑐᑎᒃ ᐃᓗᐃᒃᑲᐅᓗᒃᑖᖅᑎᓪᓗᒋᑦ ᐊᑭᓖᔭᕆᐊᖃᕐᓂᐊᕋᓂ ᑕᐃᓐᓇ ᐊᑐᖅᑎᐅᔪᖅ ᐅᕝᕙᓘᓐᓃᑦ ᖃᕆᑕᐅᔭᓄᑦ ᒪᑐᐃᖅᓯᔪᓐᓇᐅᑎᓂᒃ ᓇᕿᑦᑕᖅᑳᕆᐊᖃᖅᑎᑕᐅᓇᑎᒃ.
ᐊᖏᖅᓯᒪᔾᔪᑎᖃᕐᓂᖅ ᐊᑐᖅᑕᐅᔪᓐᓇᕐᓂᖏᓐᓄᑦ ᐊᒻᒪᓗ ᑭᓪᓕᖃᓕᖅᑎᑕᐅᓯᒪᓂᖏᑦ ᐊᑐᖅᑕᐅᔪᓐᓇᖅᑎᑦᑎᓂᕐᓄᑦ
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐅᔾᔨᕈᓱᒻᒪᑕ, ᑭᓯᐊᓂᓗᑦᑕᐅᖅ, ᑐᓂᓯᓯᒪᔪᑦ ᐃᓅᖃᑎᒌᑦᑐᓂᒃ ᐊᖏᖅᑕᐅᓯᒪᓕᕈᑎᓂᒃ ᐱᓯᒪᓕᖅᑳᖁᔨᓯᒪᑐᐃᓐᓇᕆᐊᖃᕐᒪᑕ ᐱᖁᑎᒋᔭᑎᒃ ᐊᑐᖅᑕᐅᔪᒪᑉᐸᑕ. ᑎᑎᕋᖅᑎᐅᔪᑦ ᐃᓛᓐᓂᑦ ᖃᓄᐃᑦᑑᓂᖃᕐᓂᖏᓐᓄᑦ ᒪᓕᓪᓗᒋᑦ ᑭᒃᑯᑦ ᐊᑐᕈᓐᓇᖅᑎᑕᐅᓂᖏᓐᓂᑦ ᑭᓪᓕᖃᓕᖅᑎᑦᑎᓂᕐᒥᓐᓂᒃ ᐋᖅᑮᓯᒪᔪᒪᑐᐃᓐᓇᕆᐊᖃᕆᕗᑦ. ᑕᐃᒪᓐᓇᐃᓐᓂᖅᐸᑦ ᐅᕝᕙᓘᓐᓃᑦ ᐊᔾᔨᐸᓗᖓᑎᒍᑦ ᐋᖅᑭᑦᑕᐅᓯᒪᔪᖃᖅᐸᑦ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐱᖁᑎᓂᒃ ᑐᓂᔭᐅᖃᑦᑕᕈᓐᓇᖅᑐᑦ ᑎᑎᖅᑲᓂᒃ ᐊᑐᐃᓐᓇᐅᑎᑕᐅᖖᒋᑦᑐᓄᑦ ᑭᒃᑯᑐᐃᓐᓇᕐᓄᑦ ᐊᒻᒪᓗ ᐃᓕᔭᐅᓯᒪᓂᐊᕋᑎᒃ ᐊᑐᐃᓐᓇᐅᑎᑕᐅᓪᓗᑎᒃ ᐱᖁᑎᐅᔪᓄᑦ ᑲᑎᖅᓱᒐᓂ.
ᐃᒪᓐᓇ ᐊᔾᔨᒌᖖᒋᑦᑐᑎᒍᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᖅᑕᐅᓯᒪᔾᔪᑎᓂᒃ ᐱᓯᒪᔭᕆᐊᖃᖅᑎᑦᑎᔪᓐᓇᖅᐳᑦ ᐅᕝᕙᓘᓐᓃᑦ ᐊᑐᓕᖅᑎᑦᑎᓯᒪᓕᖁᔨᓗᑎᒃ ᑭᓪᓕᖃᓕᖅᑎᑦᑎᔾᔪᑎᓂᒃ ᐱᖁᑎᐅᔪᑦ ᒪᑯᓂᖓ ᐃᓚᖃᕐᓗᒋᑦ:
- ᐱᖁᑎᒧᑦ ᓇᓗᓇᐃᔭᐅᑎᒃᑯᑦ ᓱᓇᐅᓂᖓ ᐅᓂᒃᑳᕆᓗᒍ ᑲᑎᖅᓱᒐᓃᑦᑐᖅ ᑭᓯᐊᓂ ᐊᑐᐃᓐᓇᒥᒃ ᐊᔾᔨᖓᓂᒃ ᐃᓚᖃᖅᑎᑦᑎᓯᒪᓇᑎᒃ;
- ᖃᐅᔨᒋᐊᕐᕕᐅᔪᓐᓇᕐᓂᕐᓂᒃ ᓇᓗᓇᐃᖅᓯᓯᒪᑐᐃᓐᓇᕈᕕᑦ ᐊᒻᒪᓗ ᓇᓗᓇᐃᔭᐃᓗᑎᑦ ᖃᓄᖅ ᐊᓯᖏᑦ ᐊᑐᖅᐸᑦᑐᑦ ᐊᑐᕈᒪᓂᕐᒥᓐᓄᑦ ᑐᔅᓯᕋᐅᑎᖃᕈᓐᓇᕐᒪᖔᑕ ᐊᑐᐃᓐᓇᐅᕝᕕᐅᔪᒪᓪᓗᑎᒃ ᐱᖁᑎᐅᔪᒧᑦ ᐊᑐᖅᑕᐅᕙᓪᓕᐊᕙᓐᓂᖏᓐᓄᑦ ᑐᖖᒐᕕᖃᖅᑎᓯᒪᓗᒋᑦ;
- ᐃᓕᓐᓂᒃ ᓇᒻᒥᓂᖅ ᐊᒻᒪᓗ/ᐅᕝᕙᓘᓐᓃᑦ ᑎᒥᖁᑎᐅᔪᓄᑦ ᐃᓚᐅᖃᑕᐅᕝᕕᒋᔭᕐᓄᑦ ᑎᑎᕋᖅᓯᒪᓂᑎᑦ ᑭᓇᐅᓂᕐᓄᑦ ᓇᓗᓇᐃᒃᑯᑕᓂᒃ ᑲᑎᖅᓱᐊᖑᔪᓂ, ᓲᕐᓗ, ᐃᑲᔪᖅᑕᐅᕝᕕᐅᓪᓗᑎᒃ ᐃᖅᑲᓇᐃᔭᕐᕕᐅᔪᒧᑦ, ᓄᓇᓕᐅᔪᓂ ᐱᓕᕆᔨᓄᑦ, ᐃᑭᐊᖅᑭᕕᑎᒍᑦ ᐱᑐᒃᓯᒪᕝᕕᖕᒧᑦ, ᐅᕝᕙᓘᓐᓃᑦ ᖃᐅᔨᒪᓂᕆᔭᐅᔪᓂᒃ ᐸᐸᑦᑎᔨᐅᔪᒧᑦ/ᑎᒍᒥᐊᖅᑎᐅᔪᒧᑦ.
ᐊᑐᓕᖅᑎᑦᑎᔪᒪᒍᕕᑦ ᐊᖏᖅᓯᒪᐅᑎᓐᓂᒃ ᐱᖁᑎᓐᓄᑦ ᑐᓂᓯᒪᓕᖅᑕᕐᓄᑦ ᐅᕝᕙᓘᓐᓃᑦ ᑭᓪᓕᖃᓕᖅᑎᓯᒪᒍᒪᒍᓐᓂ, ᑕᒪᒃᑯᐊ ᐅᖃᖅᓯᒪᔭᕆᐊᖃᖅᐸᑎᑦ ᑐᓂᓯᒋᐊᕝᕕᓐᓂ ᐊᑐᕐᓗᒋᑦ ᐱᖁᑎᓐᓂᒃ ᑐᓂᓯᓯᒪᓂᕐᒧᑦ ᑕᑕᑎᕆᐊᓖᑦ. ᐊᓯᒃᑲᓐᓂᖏᓐᓂᒃ ᐊᖏᖅᓯᒪᐅᑎᓐᓄᑦ ᐅᕝᕙᓘᓐᓃᑦ ᑭᓪᓕᖃᖅᑎᑦᑎᓯᒪᓂᕐᓄᑦ ᐅᖃᖅᓯᒪᐅᑎᓂᒃ ᐃᓚᖃᖅᑎᑕᐅᖖᒋᑉᐸᑕ ᑐᓂᓯᒋᐊᕝᕕᓐᓂ, ᑕᐃᓐᓇ ᐱᖁᑏᑦ, ᓈᒻᒪᒋᔭᐅᓯᒪᓕᕐᓂᕈᓂ ᑲᑎᖅᓱᐊᖑᔪᓄᑦ ᐃᓕᔭᐅᓂᐊᕐᓂᖏᓐᓂᒃ, ᐊᑐᐃᓐᓇᐅᓕᖅᑎᑕᐅᓂᐊᕐᒪᑕ ᑭᒃᑯᓕᒫᓄᑦ ᒪᑐᐃᖓᑎᑕᐅᓗᑎᒃ ᓲᕐᓗ ᓇᓗᓇᐃᔭᖅᑕᐅᓯᒪᒻᒪᑕ ᑖᒃᑯᐊ ᖁᓛᓂ.
ᐊᓯᖏᓐᓂᑦᑕᐅᖅ ᐃᓱᒪᓕᐅᕈᑎᒋᔭᐅᔪᓂᒃ ᐊᒻᒪᓗ ᖃᓄᖅ ᐃᑲᔪᓕᕈᓐᓇᒻᒪᖔᑦᑎᒋ ᑐᓂᓯᒪᔭᕐᓄᑦ ᑲᑎᖅᓱᐊᖑᔪᓄᑦ ᐱᔾᔪᑎᖃᖅᑐᓂᒃ ᑐᓴᖅᑎᑕᐅᔪᒪᑦᑎᐊᖅᑐᒍᑦ.
4. ᑐᓂᔭᐅᓯᒪᔪᑦ ᐊᑐᖅᑕᐅᕙᓐᓂᐊᕐᓂᖏᑦ
ᐃᓚᒋᔭᐅᖃᑕᐅᑎᓪᓗᒍ ᖃᓄᐃᓕᖓᑎᑦᑎᓂᐅᔪᓄᑦ ᐱᔾᔪᑎᖃᕐᓗᑎᒃ ᐊᑐᐃᓐᓇᐅᑎᑦᑎᓂᕐᒧᑦ ᑲᑎᖅᓱᒐᓂ ᐱᖁᑎᓄᑦ, ᖃᓄᐃᓕᖓᓐᓂᐅᑎᑕᐅᔪᓂᒃ ᐱᑕᖃᕐᒪᑦ ᐱᔾᔪᑎᖃᖅᑐᓂᒃ ᑲᑎᖅᓱᐊᖑᔪᓂ ᐱᖁᑎᑦ ᐊᑐᖅᑕᐅᕙᓐᓂᐊᕐᓂᖏᓄᑦ. ᐃᔾᔪᐊᖅᑕᐅᔭᕆᐊᖃᖖᒋᓐᓂᖏᓄᑦ ᑎᒍᒥᐊᖅᑕᐅᔪᑦ ᐊᓯᐊᒍᑦ ᑐᒃᓯᕋᐅᑎᖃᖅᓯᒪᓐᓂᖖᒋᑉᐸᑦ, ᑕᐃᓐᓇ ᐱᖁᑎᐅᔪᖅ ᑐᓂᔭᐅᓯᒪᔪᖅ ᐊᑐᖅᑕᐅᕙᖑᓐᓇᕐᓂᐊᕐᑐᖅ ᐃᒪᓐᓇ ᐊᒻᒪᓗ ᑮᓇᐅᔾᔭᒃᓴᓇᓱᐊᕈᑎᒋᓂᐊᖖᒋᓪᓗᒋᑦ ᑭᓯᐊᓂ ᐊᒻᒪᓗ ᐃᓕᑕᕆᔭᐅᕙᐃᓐᓇᕐᓂᐊᖅᑎᓪᓗᒍ ᑐᓂᓯᓯᒪᓕᓚᐅᕐᑐᖅ ᑎᑎᕋᖅᓯᒪᔪᖁᑎᒥᓂᒃ:
- ᑭᒃᑯᑐᐃᓐᓇᐃᑦ ᐊᒻᒪᓗ ᐃᓛᒃᑰᖅᑐᑦ ᐊᑐᖅᐸᑦᑐᑦ ᖃᕆᑕᐅᔭᑎᒍᑦ ᐊᒧᓯᓯᒪᓕᕈᓐᓇᖅᐳᑦ ᐱᖁᑎᒋᔭᕐᓂᒃ.
- ᑭᒃᑯᑐᐃᓐᓇᐃᑦ ᐊᒻᒪᓗ ᐃᓛᒃᑰᖅᑐᑦ ᐊᑐᖅᐸᑦᑐᑦ ᐊᔾᔨᖏᓐᓂᒃ ᐊᒥᓱᓕᐅᕈᓐᓇᖅᐳᑦ ᐱᖁᑎᒋᔭᕐᓂᑦ. ᑕᒪᓐᓇ ᐃᓚᖃᖅᐳᖅ ᐊᒥᓱᓕᐅᕈᓐᓇᕐᓂᕐᒥᒃ ᐱᖁᑎᐅᔪᒥᒃ ᐊᔾᔨᒌᖖᒋᐅᖅᑐᑎᒍᑦ ᐋᖅᑭᐅᒪᓂᖃᖅᑎᑦᑎᓗᑎᒃ, ᓲᕐᓗ, ᑎᑎᕋᖅᓯᒪᔪᓕᐅᕐᓗᑎᒃ ᐊᔾᔨᖏᓐᓂᑦ ᐱᓯᒪᓕᓚᐅᖅᑕᒥᓐᓂᑦ.
- ᑭᒃᑯᑐᐃᓐᓇᐃᑦ ᐊᒻᒪᓗ ᐃᓛᒃᑰᖅᑐᑦ ᐊᑐᖅᐸᑦᑐᑦ ᐱᖁᑎᓐᓂᑦ ᐊᒥᓱᓕᐅᖅᑕᐅᓯᒪᔪᓂᒃ ᐊᒥᖅᑳᖃᑎᖃᖃᑦᑕᕈᓐᓇᖅᐳᑦ ᐊᓯᒥᓐᓂᒃ.
- ᑭᒃᑯᑐᐃᓐᓇᐃᑦ ᐊᒻᒪᓗ ᐃᓛᒃᑰᖅᑐᑦ ᐊᑐᖅᐸᑦᑐᑦ ᐱᖁᑎᓐᓂᒃ ᐋᖅᑮᒋᐊᖃᑦᑕᕈᓐᓇᖅᐳᑦ ᐊᓯᖏᓐᓄᑦ ᐃᓄᓐᓄᑦ ᑐᕌᖓᑎᑕᐅᓯᒪᓪᓗᑎᒃ, ᐃᓕᓐᓂᐊᓕᓵᖅᑐᓄᑦ ᐱᓕᕆᐊᓄᑦ ᐊᑐᕐᓂᐊᕐᓗᓂᒋᑦ. ᑕᒪᒃᑯᐊ ᐃᓚᖃᖅᐳᑦ ᐱᓕᕆᐊᖑᕙᑦᑐᓄᑦ ᓲᕐᓗ ᑕᕐᕆᔭᒐᔅᓴᓕᐅᕐᓂᕐᒥᓐᓂ ᐅᕝᕙᓘᓐᓃᑦ ᓂᐱᓕᐅᖅᑕᐅᓯᒪᔪᓕᐅᕐᓂᐊᕐᓂᕐᒥᓐᓂ ᑎᑎᕋᖅᑕᐅᓯᒪᓪᓗᑎᒃ ᐃᑲᔪᕈᑎᔅᓴᓕᐊᖑᓯᒪᔪᓂᑦ ᐅᕝᕙᓘᓐᓃᑦ ᐋᖅᑮᒋᐊᕐᓂᐊᕐᓗᑎᒃ ᓄᓇᕕᒻᒥᐅᓄᑦ ᑐᕌᖓᑎᑕᐅᓪᓗᑎᒃ ᐃᑲᔪᕈᑎᔅᓴᓕᐊᖑᓯᒪᔪᓂᒃ ᐊᑐᖅᑕᐅᓂᐊᖅᑎᓪᓗᒋᑦ ᐃᓄᒋᐊᑦᑐᓂᕐᒥᐅᓂ ᐋᑐᕙᒥᐅᓄᑦ.
- ᑭᒃᑯᑐᐃᓐᓇᐃᑦ ᐊᒻᒪᓗ ᐃᓛᒃᑰᖅᑐᑦ ᐊᑐᖅᐸᑦᑐᑦ ᐱᖁᑎᓐᓂᒃ ᐊᓯᖏᓐᓄᑦ ᐅᖃᐅᓯᕐᓄᑦ ᑐᑭᓕᐅᕆᔪᓐᓇᖃᑦᑕᕐᓂᐊᖅᐳᑦ.
ᐊᒻᒪᓗᒃᑲᓐᓂᖅ, ᐊᑐᖅᐸᓐᓃᑦ ᑲᑎᖅᓱᐊᖑᓪᓗᑎᒃ ᐱᖁᑎᖏᔭᔪᓄᑦ ᒪᓕᒋᐊᖃᖅᑎᑕᐅᓂᐊᕐᒪᑕᑲᑎᖅᓱᒐᓂᒃ ᐊᑐᖅᐸᓐᓂᕐᒧᑦ ᒪᓕᒃᑕᐅᔭᕆᐊᓕᖁᑏᑦ ᐊᒻᒪᓗ ᒪᓕᒐᖁᑏᑦ.
ᐊᖏᖅᓯᒪᔾᔪᑎᑦ ᐊᒻᒪᓗ ᑭᓪᓕᖃᖅᑎᑕᐅᓯᒪᓂᖏᑦ ᐊᑐᖅᑕᐅᔪᓐᓇᕐᓂᖏᑦ
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐅᔾᔨᕈᓱᒻᒪᑕ ᐃᓚᖏᑦ ᐱᖁᑎᐅᔪᑦ ᐃᓚᐅᖅᓯᒪᑐᐃᓐᓇᕆᐊᖃᒻᒪᑕ ᐊᑦᑐᖅᑕᐅᓴᕋᐃᓐᓇᖅᑑᑎᓂᒃ ᐊᒻᒪᓗ/ᐅᕝᕙᓘᓐᓃᑦ ᑕᐃᒃᑯᐊ ᑐᓂᓯᓯᒪᔪᐃᑦ ᐊᑐᓕᖅᑎᑦᑎᑐᐃᓐᓇᕆᐊᖃᒻᒪᑕ ᐃᓚᖏᑎᒍᑦ ᑭᓪᓕᖃᖅᑎᑦᑎᔾᔪᑎᓂᒃ ᐊᑐᖅᑕᐅᑦᑕᐃᓕᔾᔪᑎᒋᔭᐅᔪᓂᒃ ᐊᑐᖅᑕᐅᕙᓐᓂᐊᕐᓂᖏᓐᓄᑦ. ᑕᐃᒪᓐᓇᐃᑦᑑᑎᓪᓗᒍ ᐊᒻᒪᓗ ᐊᔾᔨᕐᓚᖏᑎᒍᑦ ᐋᖅᑭᑦᑕᐅᓯᒪᑎᓪᓗᒋᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐱᖁᑎᓂᒃ ᑐᓂᔭᐅᓯᒪᔪᓂᒃ ᓈᒻᒪᔅᓴᖃᑦᑕᕐᓂᐊᖅᑐᑦ ᑐᖖᒐᕕᖃᖅᑎᑕᐅᓯᒪᔪᓄᑦ ᐅᖓᑖᒍᑦ ᐊᑐᖅᑕᐅᔪᓐᓇᖅᑎᑕᐅᓂᖏᑦ ᑭᓪᓕᖃᖅᑎᑕᐅᓯᒪᓪᓗᑎᒃ ᐊᖏᖅᑕᐅᖅᑳᖅᓯᒪᔭᕆᐊᖃᓪᓗᑎᒃ ᐊᑐᖅᑕᐅᔪᓐᓇᓐᓂᕆᔭᖏᓐᓂᓪᓗ ᐊᔾᔨᒌᖖᒋᑦᑐᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᖅᑕᐅᓯᒪᖅᑳᖅᑎᑦᑎᕙᓐᓂᐊᖅᐳᑦ ᐅᕝᕙᓘᓐᓃᑦ ᑭᓪᓕᖃᓕᖅᑎᑕᐅᓂᖏᑦ ᐊᑐᓕᖅᑎᑕᐅᓗᑎᒃ ᐊᑐᖅᑕᐅᕙᓐᓂᖏᑕ ᐱᖁᑎᒋᔭᐅᔪᑦ ᐃᓚᖃᓪᓗᑎᒃ ᒪᑯᓂᖓ:
- ᖃᔅᓰᕐᓗᑎᒃ ᐊᑐᖅᑕᐅᓂᖓ ᑭᓪᓕᖃᖅᑎᓪᓗᒋᑦ ᐃᓛᒃᑰᖅᑐᓄᑦ, ᓄᓇᖅᑲᑎᒌᓄᑦ, ᐊᒻᒪᓗ ᑭᒃᑯᑐᐃᓐᓇᓄᑦ;
- ᑕᑯᔅᓴᐅᑎᑦᑎᓂᖅ ᑐᕌᕈᑎᓐᓂᒃ ᐅᖄᓚᐅᑎᓐᓂᓪᓗ ᐊᒻᒪᓗ ᓇᓗᓇᐃᖅᓯᒪᓗᒋᑦ ᖃᓄᐃᓕᖓᓯᒪᔾᔪᑎᓐᓂᒃ ᐊᓯᖏᑦ ᐊᑐᖅᐸᑦᑐᑦ ᐊᖏᖅᑕᐅᔾᔪᑎᖏᑦ ᑐᔅᓯᕋᐅᑎᖃᖅᑳᕈᓐᓇᖁᓪᓗᒋᑦ ᐊᑐᕈᒪᓂᕐᒥᓐᓄᑦ ᐱᖁᑎᒋᔭᕐᓂᒃ ᓇᓗᓇᐃᖅᓯᒪᓗᓂᒋᑦ ᖃᓄᖅ ᐊᑐᕐᓂᐊᕐᒪᖔᕐᒥᒋᑦ;
- ᑭᒃᑯᑐᐃᓐᓇᐃᑦ ᐃᓛᒃᑰᖅᑐᑦ ᐋᖅᑭᒋᐊᖅᓯᓚᐅᖅᑐᑦ ᐅᕝᕙᓘᓐᓃᑦ ᑐᑭᓕᐅᕆᓯᒪᓚᐅᖅᑐᑦ ᐱᖁᑎᒋᔭᕐᓂᒃ ᑐᓂᓯᖃᑕᐅᖁᓗᒋᑦ ᓄᑖᓐᖑᕆᐊᖅᓯᒪᓗᓂᒋᑦ ᑲᑎᖅᓱᐊᖑᔪᓄᑦ;
- ᐱᖁᑎᒋᔭᖅᐱᑦ ᐊᑐᖅᑕᐅᓂᖏᓐᓄᑦ ᐊᑭᓕᖅᑕᐅᔪᒪᓗᑎᑦ ᑐᔅᓯᕋᐅᑎᖃᕈᓐᓇᕐᓃᑦ.
ᐊᑐᓕᖅᑎᑦᑎᔪᒪᒍᕕᑦ ᐊᖏᖅᑕᐅᔾᔪᑎᓂᒃ ᓯᕗᓂᐊᒍᑦ ᐅᕝᕙᓘᓐᓃᑦ ᑭᓪᓕᖃᖅᑎᑦᑐᒪᒍᕕᒋᑦ ᐊᑐᖅᑕᐅᔪᓐᓇᕐᓂᖏᑦ ᐱᖁᑎᒋᔭᖅᐱᑦ, ᑕᒪᒃᑯᐊ ᓇᓗᓇᐃᔭᖅᓯᒪᔭᕆᐊᖃᕐᓂᐊᖅᑕᑎᑦ ᑐᓂᓯᓯᒪᓕᕈᕕᑦ ᐊᑐᕐᓗᒋᑦ ᐱᖁᑎᒋᔭᒥᒃ ᑐᓂᓯᓯᒪᓕᕐᓂᕐᒧᑦ ᑕᑕᑎᕆᐊᓖᑦ. ᐃᓚᒃᑲᓐᓂᖏᓐᓂᒃ ᐊᖏᖅᑕᐅᔭᕆᐊᖃᓐᓂᕐᒧᑦ ᐅᕝᕙᓘᓐᓃᑦ ᑭᓪᓕᖃᖅᑎᑦᑎᓂᕐᒧᑦ ᐅᖃᖅᑕᐅᓯᒪᔪᖃᖖᒋᑉᐸᑕ ᑐᓂᓯᓚᐅᕕᓐᓂᑦ, ᐱᖁᑎᒋᔭᑎᑦ ᐊᑐᖅᑕᐅᓂᐊᕐᒪᑕ ᒪᓕᑦᑎᑕᐅᓗᑎᒃ ᐅᖃᖅᑕᐅᓯᒪᔪᑦ ᑖᒃᑯᐊ ᖁᓛᓂ.
ᐊᓯᖏᓐᓂᑦᑕᐅᖅ ᐃᓱᒪᓕᐅᕈᑎᒋᔭᐅᔪᓂᒃ ᐊᒻᒪᓗ ᖃᓄᖅ ᐃᑲᔪᓕᕈᓐᓇᖅᒪᖔᑦᑎᒋᑦ ᑐᓂᓯᒪᔭᕐᓄᑦ ᑲᑎᖅᓱᐊᖑᔪᓄᑦ ᐱᔾᔪᑎᖃᖅᑐᓂᒃ ᑐᓴᖅᑎᑕᐅᔪᒪᑦᑎᐊᖅᑐᒍᑦ.
5. ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᑭᓖᔭᕆᐊᖃᓐᓂᖏᑕ ᑭᓪᓕᖃᖅᑎᑕᐅᓯᒪᓂᖏᑦ
ᐃᓄᐃᑦ ᑕᐱᕇᑦ ᐊᑭᓖᔭᕆᐊᖃᓐᓂᐊᖖᒋᓚᑦ ᓈᒻᒪᖖᒋᑦᑐᑎᒍᑦ ᐱᖁᑎᒋᔭᐅᔪᑦ ᑎᑎᕋᖅᑕᐅᓯᒪᓪᓗᑎᒃ ᑲᑎᖅᓱᐊᓃᑦᑐᑦ ᐊᑐᖅᑕᐅᓐᓂᖅᐸᑕ ᐃᑭᐊᖅᑭᕕᒃᑯᑦ ᐊᑐᖅᑎᓄᑦ ᐅᕝᕙᓘᓐᓃᑦ ᑲᑎᖅᓱᐊᖑᔪᓂᑦ ᐊᑐᖅᐸᑦᑐᓄᑦ ᐅᕝᕙᓘᓐᓃᑦ ᐱᖓᔪᒋᔭᐅᓪᓗᑎᒃ ᐊᑐᖅᐸᑦᑐᓂᑦ. ᐃᓄᐃᑦ ᑕᐱᕇᒃᑯᑦ ᐊᑭᓖᔭᕆᐊᖃᓐᓂᐊᖖᒋᓚᑦ ᑕᒻᒪᖅᑕᖅᓯᒪᔪᓂᒃ ᑐᓴᒐᔅᓴᖃᖅᑎᑕᐅᓂᖏᑕ ᑎᑎᕋᖅᑕᐅᓯᒪᓂᖏᓐᓂ ᑲᑎᖅᓱᐊᖑᔪᓃᑦᑐᓄᑦ. ᐃᓄᐃᑦ ᑕᐱᕇᒃᑯᑦ ᐱᓕᕆᐊᖃᖅᑎᑕᐅᓂᐊᖖᒋᑦᑐᑦ ᐊᓯᐅᔨᔭᐅᔪᓄᑦ ᑮᓇᐅᔾᔭᓕᐊᔅᓴᖏᓐᓄᑦ, ᐅᑎᖅᑐᔅᓴᖁᑎᓄᑦ, ᐅᕝᕙᓘᓐᓃᑦ ᑐᑭᓯᒋᐊᕐᕕᔅᓴᓂᒃ; ᑮᓇᐅᔭᑎᒍᑦ ᐊᓯᐅᔨᓯᒪᓂᕐᓂᒃ ᐅᕝᕙᓘᓐᓃᑦ ᓴᓂᕋᖓᒍᑦ, ᖃᓄᐃᓐᓂᖃᖅᑎᓪᓗᒍ, ᖃᓄᐃᓚᕿᓯᒪᑎᑕᐅᓪᓗᑎᒃ, ᐃᓚᒋᔭᐅᖃᑕᐅᖖᒋᑦᑐᑎᒃ ᐅᕝᕙᓘᓐᓃᑦ ᐋᖅᑭᔅᓯᔾᔪᑕᐅᓪᓗᑎᒃ ᐊᑭᓕᐅᑎᒋᔭᐅᔪᓂᒃ ᑕᐃᒪᓐᓇᐃᓚᕿᑎᑕᐅᓪᓗᑎᒃ ᑐᓂᔭᐅᓚᐅᕐᓂᖏᓐᓂᑦ ᐅᕝᕙᓘᓐᓃᑦ ᐊᑐᖅᑕᐅᓚᐅᕐᓂᖏᓐᓄᑦ ᑲᑎᖅᓱᐊᖑᔪᓂᑦ ᐅᕝᕙᓘᓐᓃᑦ ᐃᑭᐊᖅᑭᕕᒃᑯᑦ ᑲᑎᖅᓱᒐᑦ ᐊᑐᖅᑕᐅᓚᐅᕐᓂᖏᓐᓂᑦ.
ᐃᕝᕕᑦ ᐊᒻᒪᓗ/ᐅᕝᕙᓘᓐᓃᑦ ᑎᑎᕋᖅᑎᐅᔪᖅ, ᐃᔾᔪᐊᖅᑕᐅᔪᓐᓇᖖᒋᓐᓂᖏᓐᓄᑦ ᑎᒍᒥᐊᖅᑎᐅᔪᖅ ᐅᕝᕙᓘᓐᓃᑦ ᓇᒻᒥᓂᖅ ᐱᓕᕆᕝᕕᖃᖅᑐᑦ ᐱᔾᔪᑎᖃᖅᑎᐅᓪᓗᑎᒃ ᑐᓂᓯᒪᓕᓚᐅᖅᑕᕐᓄᑦ ᑎᑎᕋᖅᓯᒪᔪᖁᑎᓂᒃ ᐅᕝᕙᓘᓐᓃᑦ ᐊᑐᖅᐸᑕ ᐃᑭᐊᖅᑭᕕᒃᑯᑦ ᑲᑎᖅᓱᒐᑦ ᐅᕝᕙᓘᓐᓃᑦ ᑲᑎᖅᓱᐊᖑᔪᓂᒃ ᖃᓄᐃᑦᓴᕆᐊᖃᖅᑎᑦᑎᓂᐊᖖᒋᓚᓯ ᐊᒻᒪᓗ ᓇᓪᓕᐅᒃᑯᒫᓂᒃ ᑲᑕᔾᔭᐃᒃᑯᑎᖃᖅᑎᑦᑎᓗᓯ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᒻᒪᓗ ᐃᓚᒋᔭᐅᔪᓄᑦ ᑖᒃᑯᓄᖓ ᑎᒥᐅᒧᑦ, ᐃᓱᒪᑕᕆᔭᖏᓐᓂᒃ, ᐱᓕᕆᔨᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᖏᓐᓂᒃ ᓇᒻᒥᓂᖃᓐᓂᕋᕋᔭᖅᐸᑕ ᐃᖅᑲᖅᑐᐃᔨᑎᒎᖅᑎᑦᑎᕙᓐᓂᕐᓂᑦ ᐅᕝᕙᓘᓐᓃᑦ ᐱᓕᕆᐊᖑᑎᑦᑎᓯᒪᓕᕐᓂᖏᓐᓂᑦ ᑕᐃᒪᐃᓚᕿᑎᑕᐅᓗᑎᒃ ᑐᓂᓯᒪᔭᐅᔪᓂᑦ ᐅᕝᕙᓘᓐᓃᑦ ᑐᓂᓯᓯᒪᓂᕐᒧᑦ ᑐᕌᖓᔪᓂᒃ ᐃᑭᐊᖅᑭᕕᒃᑯᑦ ᑲᑎᖅᓱᒐᓄᑦ ᐅᕝᕙᓘᓐᓃᑦ ᐊᑐᖅᑕᐅᕙᖕᓂᖏᑕ ᑖᒃᑯᐊ ᐃᑭᐊᖅᑭᕕᒃᑯᑦ ᑲᑎᖅᓱᒐᑦ ᐊᒻᒪᓗ/ᐅᕝᕙᓘᓐᓃᑦ ᑲᑎᖅᓱᐊᖑᔪᑦ ᐅᕝᕙᓘᓐᓃᑦ ᓯᖁᒥᑦᓯᓯᒪᓕᓚᐅᕐᓂᕐᓂᑦ ᑖᒃᑯᓂᖓ ᒪᓕᑦᑕᐅᖁᔭᐅᔪᓂᑦ ᐃᓕᓐᓄᑦ ᓇᒻᒥᓂᖅ ᐊᒻᒪᓗ/ᐅᕝᕙᓘᓐᓃᑦ ᐊᓯᐊᓂᑦ ᐊᑐᖅᑐᒥᑦ ᐅᕝᕙᓘᓐᓃᑦ ᑐᓂᓯᓚᐅᖅᑐᒥᑦ.
6. ᐋᖅᑭᒋᐊᖅᑕᐅᓯᒪᓂᖏᑦ
ᐃᓄᐃᑦ ᑕᐱᕇᑦ, ᐃᓛᓐᓂᒃᑯᑦ, ᑖᒃᑯᐊ ᑎᑎᕋᖅᑕᐅᓯᒪᓂᖏᑦ ᐋᖅᑮᒋᐊᖅᓯᑐᐃᓐᓇᕆᐊᓖᑦ, ᓲᕐᓗ, ᑕᑯᔅᓴᐅᑎᑦᑎᒋᐊᕐᓗᑎᒃ ᐋᓐᑎᐊᕆᐅᒥ ᐳᕌᕕᓐᓯᖓᑕ ᐊᒻᒪᓗ ᑲᓇᑕᐅᑉ ᓄᓇᕐᔪᐊᖓᓂ ᐱᖁᔭᖁᑎᖏᑦ ᐊᓯᔾᔨᖅᑕᐅᒐᔭᖅᐸᑕ. ᐃᓄᐃᑦ ᑕᐱᕇᒃᑯᑦ ᑎᑎᕋᖅᓯᒪᓂᖏᓐᓂᒃ ᐋᖅᑮᒋᐊᖃᕐᓂᐊᖅᐳᑦ ᐋᖅᑭᒋᐊᕈᑎᐅᔪᓂᒃ ᐃᑭᐊᖅᑭᕕᐊᒍᑦ ᐃᓕᐅᖅᑲᐃᓯᒪᕙᒡᓗᑎᒃ ᐊᒻᒪᓗ ᐅᓪᓗᒥᒧᑦ ᑎᑭᓯᓇᖅᑎᒋᐊᖅᐸᓪᓗᒋᑦ ᑭᖑᓪᓕᕐᒥᒃ ᐋᖅᑭᒋᐊᖅᑕᐅᓚᐅᕕᒋᔭᖓᓐᓂᑦ. ᐋᖅᑭᒋᐊᕈᑎᖏᓐᓂᒃ ᑕᑯᔅᓴᐅᑎᑦᑎᓕᖅᑎᓪᓗᒋᑦ, ᐅᓪᓗᒥᒧᑦ ᑎᑎᕋᖅᑕᐅᓯᒪᓂᖏᑦ ᐊᑐᓕᑦᑎᑕᐅᕙᓐᓂᐊᖅᑐᑦ. ᐃᓱᒪᔅᓴᖅᓯᐅᖁᓪᓗᒋᑦ ᑲᑎᖅᓱᒐᑦ ᐃᓕᔭᐅᓯᒪᔪᓐᓇᕆᐊᖏᑕ ᑎᑎᕋᖅᓯᒪᔪᖁᑎᓐᓂᒃ ᑐᓂᓯᓯᒪᓂᖅ ᐊᑐᓕᖅᑎᑦᑎᓯᒪᔾᔪᑎᐅᒻᒪᑦ ᓈᒻᒪᔅᓴᓐᓂᕐᒥᒃ ᐋᖅᑭᒋᐊᕈᑎᐅᔪᓂᒃ ᐊᒻᒪᓗ ᐊᖏᕈᑎᐅᓯᒪᔪᓂᒃ ᐃᓗᐃᒃᑲᐅᑎᓪᓗᒋᑦ.
7. ᒪᓕᒐᖁᑎᐅᔪᑉ ᐊᑐᓕᖅᑎᑕᐅᓯᒪᓂᖓ
ᐅᓇ ᐊᖏᕈᑎᐅᔪᖅ ᐊᐅᓚᑕᐅᔪᖅ ᒪᓕᒐᖁᑎᒋᔭᐅᔪᓄᑦ ᐋᓐᑎᐊᕆᐅ ᐳᕌᕕᓐᓯᖓᓂ, ᐊᒻᒪᓗ ᐊᑐᓕᖅᑎᑕᐅᓯᒪᒋᐊᖃᕈᑎᒃ, ᑲᓇᑕᐅᑉ ᓄᓇᕐᔪᐊᖓᑕ ᐱᖁᔭᖁᑎᖏᓐᓄᑦ.