English - Click here | Inuktitut - Taanna naqillugu
ᑐᖖᒐᓱᒋᑦ ᑲᑎᖅᓱᒐᓄᑦ: ᐃᓄᐃᑦ ᐃᓕᓐᓂᐊᓕᓵᖅᑐᓄᑦ ᐃᓕᓐᓂᐊᖅᑎᑦᑎᔾᔪᑎᒃᓴᖏᓄᑦ.
ᐃᓄᖕᓄᑦ ᐃᓕᑦᓯᕙᓪᓕᐊᓕᓵᖅᑐᓄᑦ ᐱᕙᓪᓕᐊᑎᑦᑎᓂᐅᔪᐃᑦ ᐃᓂᖃᓕᖅᑎᑦᑎᓯᒪᒻᒪᑕ ᐃᓄᐃᑦ ᓱᕈᓯᖏᑕ ᐱᕈᖅᓴᕙᓪᓕᐊᑎᑕᐅᓂᖏᑦ, ᐋᓐᓂᐊᕐᓇᖃᓕᖅᑕᐃᓕᒪᑎᑕᐅᓂᖏᑦ ᐊᒻᒪᓗ ᖃᓄᐃᖖᒋᑦᑎᐊᖅᑎᑕᐅᓂᖏᑕᓗ ᓯᕗᓪᓕᖅᐸᐅᑎᑕᒃᓴᖖᒍᖅᑎᑕᐅᓚᐅᕐᒪᑦ. ᐱᑕᖃᖖᒋᑎᓪᓗᒋᑦ ᐃᓄᖕᓄᑦ ᑐᕌᖓᓪᓗᑎᒃ ᐃᓕᑦᓯᕙᓪᓕᐊᓕᓵᖅᑐᓄᑦ ᐃᓕᓐᓂᐊᕈᑎᒃᓴᓄᑦ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ, ᐱᓕᕆᖃᑎᒋᓪᓗᒋᑦ ᓱᕈᓯᖏᓂᒃ ᐃᓄᐃᑦ ᐸᐃᕆᕝᕕᓕᕆᓂᕐᒧᑦ ᐋᖅᑭᒃᓱᐃᔨᒋᔭᐅᔪᓂᒃ ᐃᓄᐃᑦ ᓄᓇᓕᓕᒫᖏᓂ, ᑖᒃᑯᓂᖓ ᖃᕆᑕᐅᔭᑎᒍᑦ ᐱᑐᒃᓯᒪᕝᕕᒃᓴᓂᒃ ᑲᑎᖅᓱᐃᓯᕙᓪᓕᐊᓂᕐᒧᑦ ᐋᖅᑮᓯᒪᓕᓚᐅᕐᒪᑕ ᐱᐅᓯᑐᖃᒃᑯᑦ ᐊᒻᒪᓗ ᐅᖃᐅᓯᓕᕆᓂᒃᑯᑦ ᓈᒻᒪᒃᑑᓪᓗᑎᒃ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ ᓱᕈᓯᖏᓄᑦ ᐃᓄᐃᑦ ᐊᒻᒪᓗ ᐃᓚᒌᖑᔪᓄᑦ.
ᑖᒃᑯᓇᓂ ᑲᑎᖅᓱᐊᖑᓯᒪᔪᓂ, ᓇᓂᓯᖃᑦᑕᕐᓂᐊᕋᕕᑦ ᐊᔾᔨᒌᖖᒋᐅᖅᑐᓂᒃ ᑎᑎᕋᖅᑕᐅᓯᒪᔪᖁᑎᓂᒃ, ᒪᓕᒐᖁᑎᓕᕆᓂᕐᒧᑦ ᐅᖃᓕᒫᒐᕐᓂᑦ, ᐃᓕᓐᓂᐊᖅᑎᑦᑎᔾᔪᑎᒃᓴᐅᓪᓗᑎᒃ ᓴᓇᕐᕈᑎᓂᒃ ᐊᒻᒪᓗ ᓂᕆᔭᒃᓴᓕᐅᖅᐸᓐᓂᕐᒧᑦ ᐸᕐᓇᐅᑎᒃᓴᓄᑦ, ᐱᓕᕆᐊᖑᓕᖅᑎᑕᐅᔪᓐᓇᖅᑐᓄᑦ ᓱᕈᓯᕐᓄᑦ ᐊᒻᒪᓗ ᓯᕗᓪᓕᖅᐸᐅᓪᓗᑎᒃ ᖃᐅᔨᓴᕈᑎᐅᓚᐅᖅᓯᒪᔪᓄᑦ ᐃᓄᐃᑦ ᒥᑭᔪᓄᑦ ᓱᕈᓯᕐᓄᑦ ᐱᕙᓪᓕᐊᑎᑦᑎᓯᔾᔪᑎᒃᓴᓕᕆᓂᕐᓂ. ᑖᒃᑯᐊ ᑎᑎᕋᖅᑕᐅᓯᒪᔪᐃᑦ ᐊᑐᕐᓂᖃᖅᑑᑎᑕᐅᖁᒐᓗᐊᖅᐸᕗᑦ ᐃᓕᓐᓂᐊᖅᑎᑦᑎᔨᓄᑦ, ᐃᓕᓴᐃᔨᓄᑦ, ᓱᕈᓯᕐᓂᒃ ᐸᐃᕆᕝᕕᖕᓂ ᐊᐅᓚᑦᓯᔨᐅᔪᓄᑦ, ᐱᔨᑦᑎᕋᖅᑎᐅᔪᓄᑦ ᐊᒻᒪᓗ ᐊᖓᔪᖅᑳᕆᔭᐅᔪᓄᑦ ᓄᓇᖃᖅᑑᓪᓗᑎᒃ ᐃᓄᐃᑦ ᓄᓇᓕᓕᒫᖏᓐᓂ (ᐃᓄᐃᑦ ᓄᓇᖓᓐᓂ) ᐊᒻᒪᓗ ᑲᓇᑕᒥᐅᖑᔪᓄᑦ.
ᑲᑎᖅᓱᐊᕆᔭᐅᓯᒪᔪᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ (ITK) ᐱᓕᕆᐊᖑᒋᐊᖅᓯᒪᑎᑕᐅᒻᒪᑦ, ᑲᓇᑕᓕᒫᒥ ᐃᓄᐃᑦ ᑲᑐᔾᔨᖃᑎᒌᒋᔭᖏᑕ. ᐃᑲᔪᖅᑎᒌᖕᓂᖃᖅᑐᑎᒃ ᐱᓕᕆᐊᖑᓕᖅᓯᒪᕗᑦ ITK-ᑯᑦ ᐋᓐᓂᐊᖃᕐᓇᖖᒋᑦᑐᓕᕆᔨᑦ ᐊᒻᒪᓗ ᐃᓅᓯᓕᕆᓂᕐᒥ ᐱᕙᓪᓕᐊᔪᓕᕆᔨᖏᓂᑦ ᐊᒻᒪᓗ ᐃᓄᐃᑦ ᖃᐅᔨᓴᕐᕕᖓᓐᓂᑦ (ITK-ᑯᑦ ᐃᓄᐃᑦ ᖃᐅᔨᒪᔭᖏᓄᑦ ᐱᓕᕆᕝᕕᐊᓐᓂᑦ) ᐃᑲᔪᕈᑎᒃᓴᐅᓪᓗᑎᒃ ᖃᐅᔨᒪᓂᕆᔭᒥᓐᓂᒃ ᑐᓂᓯᒪᓕᖃᑦᑕᐅᑎᓂᒃᓴᖏᓂᒃ ᐃᓄᐃᑦ ᓄᓇᓕᒋᔭᖏᓐᓂ ᐊᒻᒪᓗ ᐱᐅᓂᖅᓴᐅᔪᒃᑯᑦ ᑐᓴᒐᒃᓴᖁᑎᐅᔪᓂᒃ ᐃᓄᐃᑦ ᐃᓕᑦᓯᕙᓪᓕᐊᓕᓵᖅᑐᓄᑦ ᐃᓕᓐᓂᐊᕈᑎᒃᓴᓂᒃ ᐊᑐᐃᓐᓇᐅᑎᑦᑎᕙᓕᕋᔭᕐᓂᕐᒧᑦ, ᓱᕈᓯᕐᓂᒃ ᐱᕈᖅᓰᔾᔪᓯᐅᕙᒃᑐᓄᑦ ᐊᒻᒪᓗ ᐊᖓᔪᖅᑳᖑᔪᑦ ᐱᕈᖅᓴᐃᔾᔪᓯᕆᕙᒃᑕᖏᓂᒃ.
ᐱᓕᕆᐊᖑᑲᐃᓐᓇᖅᑐᒧᑦ ᐱᔾᔪᑎᖏᓂᒃ ᑖᒃᑯᐊ ᐋᖅᑭᒃᓱᐃᔨᐅᕗᑦ ᐃᓄᐃᑦ ᐃᓕᑦᓯᕙᓪᓕᐊᓕᓵᖅᑐᓄᑦ ᐃᓕᓐᓂᐊᕈᑎᒃᓴᓕᕆᓂᕐᒥ ᑎᒥᖁᑎᒋᔭᖏᑦ ᐱᔾᔪᑎᒋᔭᐅᔪᖃᖅᑐᓂᒃ ᐅᑯᐊ ᑲᑐᔾᔨᖃᑎᒌᖏᓂᑦ:
- ᓄᓇᕗᑦ ᒐᕙᒪᖓᑦ
- ᑲᑎᕕᒃ ᐊᕕᒃᑐᖅᓯᒪᓂᖓᓂ ᒐᕙᒪᖓᑦ
- ᑲᑭᕙᒃ ᑲᑐᔾᔨᖃᑎᒌᖏᑦ
- ᑭᕙᓪᓕᖅ ᐃᑲᔪᖅᑎᒌᑦ ᐱᕙᓪᓕᐊᔪᓕᕆᔨᖏᑦ
- ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ
- ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓ
- ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ
- ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ